Ang Pahibalo sa Petsa sa Adlaw sa Pagkabanhaw nagsugod sa panahon nga nihit pa ang mga kalendaryo. Bisan tuod ug dili na nihit ang kalendaryo karon, makahuluganon gihapon kini kay nagpahinumdum kini kanato nga ang pagkabanhaw sa atong Ginoo mao ang sentro ug ang naghatag ug kahulugan sa liturhikanhong tuig sa Simbahan.
***
Mga igsuon, ang himaya sa Dios misidlak kanato, ug sa kanunay madayag dinhi kanato hangtud sa adlaw sa Iyang pagbalik. Pinaagi sa dagan sa mga takna ug mga panahon, saulugon ta ang mga misteryo sa kaluwasan.
Handumon ta ang kinatumyan sa tuig, ang Triduo sa Pagkabanhaw sa Ginoo: ang Iyang Katapusang Panihapon, ang Iyang kamatayon sa krus, ang Iyang paglubong, ug ang Iyang Pagkabanhaw nga saulugon sulod sa gabii sa ika-lima sa Abril (Abril 5) hangtud ug sa gabii sa ika-walo sa Abril (Abril 8).
Matag Pasko sa Pagkabanhaw—sama sa matag Domingo—ang Balaan nga Simbahan nagdala sa atong taliwala sa daku ug makaluwas nga buhat diin si Cristo sa kanunay mibuntog sa sala ug sa kamatayon.
Gikan sa Pagkabanhaw, atong gitimaan ang tanang mga adlaw nga atong gibalaan:
Ang Miyerkoles sa Abo, nga mao ang sinugdanan sa Kwaresma, mahitabo sa ika-kawhaan ug duha sa Pebrero (Pebrero 22).
Ang Pagkayab sa Ginoo sa langit atong handumon sa ika-kawhaan sa Mayo (Mayo 20).
Ang Pentekostes, ang pagkunsad sa Espiritu Santo , nga mao ang malipayong pagtak-um sa panahon sa Pasko sa Pagkabanhaw saulugon sa ika-kawhaan ug pito sa Mayo (Mayo 27).
Ug karong tuiga, ang unang Domingo sa Adbiyento mahitabo sa ikaduha sa Disyembre (Disyembre 2).
Sa maong paagi, ang nagpanaw nga Simbahan nagsangyaw sa Pasko sa Pagtabok sa Ginoo diha sa mga pangilin sa Santa nga Inahan sa Dios, sa mga pangilin sa mga apostol ug sa mga santos, uban kanila si Beato Pedro Calungsod, kansang pangilin karong tuiga saulugon sa ika-katloan ug usa sa Marso (Marso 31) ug diha usab sa paghandum sa mga magtutuo nga nangamatay.
No comments:
Post a Comment