Mahitungod sa Santos nga Pagkalawat

Kapila naman kita nakadungog nga “we become what we eat.” Kon baboy ang kanunay nato nga kan-on, mahimo pud tang murag baboy. Kon buwad ang permi nato kan-on, mahimo pud tang murag buwad. Kita nga kanunay nagkalawatan sa lawas ug dugo ni Cristo, nahimo na ba kitang sama ni Cristo? Ngano man kaha nga daw wala may epekto sa atong kinabuhi ang atong pagkalawat? Basin tingali tungod kay wala nato maamgo ang pagkamakahuluganon sa atong pagkalawat matag simba nato.

Dili unsa apan kinsa ang gikalawat. Oo, gamay ug nipis nga biskwit ang atong gidawat apan ang atong pagtoo nagtudlo kanato nga kining gamay ug nipis nga puti ug lingin nga biskwit mao ang lawas, dugo, kalag, ug pagka-Dios—ang kinatibuk-an sa pagkatawo ug pagka-Dios—sa atong Ginoong JesuCristo. Naamgo ba nato unsa ka katingalahan niini? Ang gamhanan nga Dios nahimong gamay nga biskwit handumanan sa iyang way sukod nga gugma nga giulaan sa iyang kinabuhi didto sa krus. Dili ka ba manglipaghong sa kaulaw tungod sa kakulang sa imong balus sa paghigugma? Dili ba mangurog ang imong tuhod, mohapa ikaw, ug mosimba sa Dios nga nahigugma kanimo? Maka-ako ba ikaw pagdawat niya sa imong mga kamot?

Kinsa man kita nga mangalawat? Kon ingon niini ang Dios, kinsa man kita nga mangalawat kaniya? Mga uyamot nga binuhat niya. Mga alaut nga makasasala. Mahuyang ug maluibon. Apan iyang gipili, gitawag, ug gihimong takos ug angayan! Iya kitang gipakamatyan. Iya kitang giangkon nga iyaha pinaagi sa Sakramento sa Bunyag ug iyang gilig-on pinaagi sa Sakramento sa Kumpirma. Ug kon pili-on gihapon nato nga mahibulag kaniya, nagpaabot siya sa atong pagbalik sa Sakramento sa Kumpisal.

Ang pulong “pagkalawat” sa Latin kay “communio” (sa Inglis, “communion”) tungod kay gihiusa (cum-unio) kita sa Dios sa iyang kaugalingon. Gani sa daghang mga Eucharistic miracles, ang hostiya nahimong tinuod nga unod, unod nga gikan sa kinauyukan sa kasingkasing. Pagpadayag nga sa matag kalawat nato hugot kita nga gigakos sa Dios. Ug gihiusa usab kita niya sa tanan nga iyang gipili, gitawag, ug giangkon nga iyaha. Nahimo kitang hiniusang Simbahan!

Dili kini pantasya. Mao kini ang atong Cristohanon ug Catolikong pagtoo. Ang mga Eucharistic miracles nagpamatuod niini. Ang mga santos nagpamatuod niini ug sila motabang kanato. Sangpiton nato sila ug ang atong Anghel nga Magbalantay sa sunod nato pagkalawat. Hangyoon nato sila nga tabangan kita pag-amgo kinsa Siya nga atong gikalawat ug kinsa kita nga mangalawat kaniya. Pangayoon nato ang tukmang disposisyon aron mahimong makahuluganon ug may epekto sa atong kinabuhi ang atong pagkalawat.